Statuta

Societatis Circulorum Latinorum

§ 1. De Societate Circulorum Latinorum

1.1. Societas Circulorum Latinorum (SCL) eo est condita ut Circuli Latini per totum terrarum orbem ad Latinitatem vivam colendam ac fovendam florentes conjungantur.

§ 2. De Circulis Latinis

2.1. Circuli Latini conventus sunt hominum qui statutis temporis intervallis congregantur ut Latine colloquantur. Quorum plurimi solent una bibere vel cenare, vel etiam ludere aut spectacula adire aut communes parare et facere peregrinationes. Una lingua Latina omnes semper utuntur.

2.2. Circuli Latini non solum urbis suæ incolis sed et vivæ Latinitatis cultoribus advenis hospitalem præbent occasionem Latine loquendi.

2.3. Circuli Latini linguæ Latinæ usui vivo vulgando favent ita ut inceptis pro Latinitate et suis et alienis sedulo ferant opem.

2.4. Circuli Latini nomina sua ducunt ab urbe ubi sedem habent, nullo alio cognomine addito, quo pacto ostendunt se nullam aliam causam fovere quam vivam Latinitatem, omnesque Latiniloquos homines qui urbem suam habitent visitentve acceptissimos fore. De omnibus enim rebus etiam si liberrime participibus disceptare in sessionibus suis manifesto licet, ipsi tamen Circuli Latini, præter Latinitatem, nullam aliam causam publice propugnant particularem: modum nullum vivendi, nullam religionem, factionem nullam politicam, tantum linguam Latinam eandemque vivam.

2.5. Circuli Latini SCL participandi voluntatem ostendunt per vinculum ad SCL loco perspicuo in suis sedibus positum.

2.6. Circuli Latini vitam suam ostendunt sessionum suarum actorum brevibus commentariolis in lucem datis.

§ 3. De SCL muneribus divulgativis

3.1. SCL colligit et divulgat Circulorum Latinorum domicilia, acta, omniaque scitu digna, ut rete Circulorum Latinorum innotescat omnesque possint urbis suæ CL convenire et, si quem locum visitent ubi alii sint Circuli Latini, amicos Latiniloquos visitare, eorumque sessionibus adesse.

3.2. SCL colligit et divulgat consilia ut Circulorum Latinorum varietate agendique moribus patefactis ditentur roborentur pergantque crescere sodalibus omnes qui sunt Circuli Latini, necnon facilius ut condantur novi in urbibus ubi nondum inveniuntur.

3.3. SCL colligit et divulgat acta Circulorum Latinorum, ut pateat quid Circuli Latini cum per se tum SCL gratia efficere valuerint.

§ 4. De SCL muneribus activis

4.1. SCL præbet Circulis Latinis per totum terrarum orbem dispersis forum electronicum quo omnia communicentur quæ pertineant ad Circulos Latinos condendos firmandos augendos, necnon ad vivam linguam Latinam propagandam propugnandamque.

4.2. SCL præbet Circulis Latinis per totum terrarum orbem dispersis contionem electronicam qua, latis democraticis suffragiis, agenda, id est nova ad Latinitatem pertinentia de quibus in CC LL sessionibus disseratur, consiliaque atque actiones ad propugnandam Latinitatem vivam communes, ideoque efficaciores suadeantur.

4.3. SCL convocat Circulis Latinis per totum terrarum orbem dispersis conventum annuum celebrandum, ut moderatores omnesque sodales Circulorum Latinorum inter se sententias communicent et inter omnes Circulos Latinos nexus roborentur.

§  5. De SCL democratica constitutione

5.1. SCL est societas democratica quam regunt Circuli Latini nullo alio duce quam his statutis. Potestas et legitimitas SCL nulla alia est quam ea illi tradita a Circulis Latinis liberrime participantibus.

5.1.1. SCL duos habet scribas, quorum solus munus est ita curare SCL paginas ut statuta et in contione placita accurate ad effectum perducantur. Scribis nulla potestas est agendi contra placita suffragata.

5.2. Circuli Latini sunt omnes inter se pares, quorum unusquisque singulum suffragium habet æquale.

5.3. Omnia quæ statuta et aliæ SCL paginæ continent licet mutare suffragio æquali membrorum.

 5.3.1. Ad mutanda statuta, ne naturam suam SCL facile vixque nata amittat, per primum constitutæ SCL annum, consensu democratico omnium membrorum opus erit; postea, satis erit suffragium quattuor partium (80%).

5.3.2. Ad mutandas alias SCL paginas et probanda omnia alia placita agendaque SCL, opus erit suffragio democratico quattuor partium (80%).

5.4. Circuli Latini sunt omnes liberi, non solum in participanda SCL, sed etiam ut maneant, abeant, redeant.